साढे ३ वर्षमै चमत्कार : रास्वपा २१ बाट सीधा १८२ सिटमा

काठमाडौं । राष्ट्रिय स्वतन्त्र पार्टी (रास्वपा) ले २०८२ को निर्वाचनमा ऐतिहासिक सफलता हासिल गर्दै १८२ सिट जितेर नेपाली राजनीतिमा अभूतपूर्व छलाङ मारेको छ। २०७९ मा केवल २१ सिट जितेर संसद्मा प्रवेश गरेको पार्टीले साढे तीन वर्षमै दुईतिहाइ नजिक पुग्नु ठूलो राजनीतिक परिवर्तनको संकेतका रूपमा हेरिएको छ।

पार्टीका सभापति रवि लामिछानेको नेतृत्व र काठमाडौं महानगरका मेयर बालेन शाहसँगको सहकार्य रास्वपाको उभारको मुख्य आधार बनेको विश्लेषण गरिएको छ। यी दुई प्रभावशाली व्यक्तित्वको एकताले व्यक्तिगत स्वार्थभन्दा माथि उठेर देशका लागि सहकार्य गर्ने सन्देश दिएको भन्दै मतदाताले सकारात्मक रूपमा लिएका थिए।

रास्वपाले परम्परागत चुनावी शैलीभन्दा फरक डिजिटल रणनीति अपनायो। फेसबुक, एक्स (ट्विटर), इन्स्टाग्राम जस्ता सामाजिक सञ्जालमार्फत अर्गानिक कन्टेन्ट उत्पादन, एआई प्रयोग, ‘वार रुम’ सञ्चालन र प्रत्यक्ष संवादले अभियानलाई प्रभावकारी बनायो। सीमित स्रोतका बाबजुद डिजिटल माध्यमलाई केन्द्रमा राखेर देश–विदेशका नेपालीसम्म सन्देश पुर्‍याउन सफल भयो।

त्यस्तै, जनताको प्रत्यक्ष सहभागिता, घरदैलो अभियान, ‘चुपचाप घण्टीमा छाप’ जस्ता नाराले व्यापक प्रभाव पारे। पुराना दलप्रति बढ्दो असन्तुष्टि, सुशासन र भ्रष्टाचार अन्त्यको एजेन्डा तथा नयाँ, शिक्षित र ऊर्जावान उम्मेदवारको चयनले मतदाताको भरोसा जित्न मद्दत गर्‍यो।

संगठन विस्तार, ७६ जिल्लामा संरचना निर्माण र करिब ३ लाख सदस्य आधारले पनि जितलाई बलियो बनायो। अब ठूलो जनमतसहित सरकारको नेतृत्व गर्ने तहमा पुगेको रास्वपामाथि जनअपेक्षा पूरा गर्ने चुनौती थपिएको छ